Vahid Əmirovun direktoru olduğu tibb müəssisəsində yaşanan neqativ hallar vətəndaşlar arasında ciddi narazılığa səbəb olur Bu gün ölkə ərazisində, əsasən də paytaxtda yerləşən elə klinikalar var ki, onlar durmadan telekanallar vasitəsilə reklam olunsalar da, əslində fəaliyyətlərində ciddi nöqsanlar, neqativ hallar müşahidə olunmaqdadır. Misal kimi, Bakı şəhəri, O.Salamzadə küçəsi 66 B ünvanında yerləşən «Medilux» Klinikasını göstərmək olar. Belə ki, 2004-cü ildə fəaliyyətə başlayan adıçəkilən tibb müəssisəsinin direktoru Vahid Əmirovun səbəb olduğu nöqsanların, neqativ halların vətəndaşlar arasında ciddi narazılığa səbəb olduğunu iddia edən məlumatlı şəxsin Gundelik-Baku.com-la paylaşdığı informasiyada deyilir ki, ixtisasca nevropotoloq olan direktor «Medilux» Klinikasına gəldikdən sonra burada bir sıra xoşagəlməz hallar yaşanmağa başlayıb. Sözügedən tibb ocağında kardiologiya, laboratoriya, rentgen, stomatologiya, plazmofarez, ginekologiya, fizioterapiya, kompyuter-tomoqrafiya, hidrokolonoterapiya, dermatokosmetologiya, ultrasəs müayinəsi (USM) və LOR şöbəsinin mövcud olduğunu qeyd edən mənbə bildirir ki, bu ilin yanvarın əvvəllərində paytaxtın ən bahalı özəl klinikalarından biri olan “Medilux”da ölüm hadisəsi baş verib: «Deyilənlərə görə, Vahid Əmirovun direktoru olduğu tibb müəssisəsində Dilqəm adlı həkim tərəfindən əməliyyat olunan Tovuz rayonu sakini, 1967-ci il təvəllüdlü Təranə Vaqif qızı Müseyibova elə klinikada dünyasını dəyişib. Vəfat edən qadının qohumları iddia ediblər ki, Təranə Müseyibova məhz həkimin uğursuz əməliyyatı və səhlənkarlığı nəticəsində həlak olub». Sözügedən klinikada bunabənzər halların tez-tez yaşandığını vurğulayan məlumatlı şəxsin iddiasına görə, «Medilux» Dövlət Miqrasiya Xidmətində yüksək rütbəli məmura məxsusdur: «Deyilənlərə görə, bir müddət əvvəl «Medilux» Klinikasının həkim-ginekoloqu Lalə İmanova 25 yaşlı hamilə qadın Camalova Aygün Fikrət qızını nəzarətə götürüb, 4 ay klinikada rəsmi qeydiyyata alaraq hər ay hamiləliyin gedişini izləyib. Ana hər ay 200-250 manat məbləğində pul ödəyərək analizlərdən keçib, hər şey normal qiymətləndirilib. Hamiləliyin son ayında rəngli dopleroqrafiya həkimə xəbərdarlıq siqnalı çalıb: “Köbək ciyəsi – cift uşağın boynuna dolanıb, ürək sürətlə vurur, böyrək ləyəni genişlənib, sidik kisəsi dolub”. Həm də bu xəbərdarlıq qara-yağlı hərflərlə qeyd olunub, hansı ki əvvəlki dopler müayinəsi bu cür qeyd edilməmişdi. Qeyd olunur ki, Lalə İmanova burda artıq doğuş riskini təhlükəyə atıb, vaxtında qabaqlayıcı tədbirlər haqqında düşünməyib». Nəzərinizə çatdıraq ki, o zaman bu hadisə ilə bağlı mətbuatı bilgiləndirən yeni doğulan körpənin nənəsi Dilguşə Süleymanova qeyd edib ki, həkim ananın narahatlığına məhəl qoymadan 3900 qram çəkidə olan uşağı dar çanaqdan yuxarıda göstərilən xəbərdarlığa baxmayaraq, eksperiment edərək götürməyə çalışıb: «Onun bu cəhdi uğursuzluqla nəticələndi. Doğuşu patalogiyaya çevirdi, uşağı iflic etdi, ananı isə bədbəxt. 02.10.2014-cü il tarixdə həkimlə danışdıq ki, uşaq çəkili, ana xırda, çanaq dar. Həkim bəlkə, birbaşa qeysəriyə edəsiniz. Dedi, mənə ağıl öyrətməyin. Mən həkim, ginekoloq, xirurq, mamaçayam, hamısı özüməm. Mən sizə 100% normal doğuş söz verirəm. Biz də həkimə inanaraq gözləməyə başladıq. 11.09.2015-ci il tarixdə anada doğuş sancıları başladı və biz həkimin qəbuluna getdik. Narahatlıqlarla bağlı söhbət apardıq. Lalə yenə bizi sakitləşdirdi: ”Narahat olmayın, hər şey yaxşı olacaq”. Ana etiraf etdi ki, o qorxur, məni qesrəriyyə edin. Həkim inadkarlıq göstərdi: Yox özün doğacaqsan! Amma Lalə bir az düşünüb bunu da dedi: “Əslində səni belə halda evə buraxmaqla cinayət edirəm, yatdırmalıyam. Amma UZİ sənə 18 noyabr vaxt qoyub. Get 18-də gələrsən”. O, bizi tam arxayın edərək evə yola saldı. 17 noyabrda artıq vəziyyət dəyişdi. Ananın narahatlıqları başladı və biz səhər saat 5-də Laləyə vəziyyətlə bağlı zəng vurduq. Həkim məsləhət gördü ki, artıq doğuş başlayır və ananı – Aygünü «Medilux» Klinikasına aparıb qeydiyyata salın, mən də gəlirəm. O gəlirəm, bu gəlirəm. Biz qeydiyyat etdik. Növbətçi həkim ananı apardı otağa, biz də gözləyir, tez-tez onun halından xəbər alırdıq. Mən Laləyə zəng edib onun nə vaxt gələcəyi ilə maraqlanırdım. O gah probkada olduğunu bəhanə gətirir, gah zənglərə cavab vermir, gah da işi olduğunu deyirdi. Axırıncı zəngdə mən vəziyyətdən narahat olduğumu dedim. O, yenə hər şey yaxşı olacaq deyə arxayınlıq yaratdı. Nəhayət, həkim saat 2-də gəlib klinikaya çatdı və onunla foyedə qarşılaşdıq. “Sənə indi bir söz deyəcəm” deyib getdi. Biz qiymət barədə danışmamışdıq. Normal doğuşu 1100 AZN, qeysəriyyəni isə 1250 AZN razılaşmışdıq. Həkimlə yenidən dəhlizdə rastlaşdıq. Qızım, gəlinimin xalası yenidən qeysəriyyə təklif etdilər. Həkim dedi ki, iynə vurmuşam, sistem qoşmuşam, 2 saatdan sonra bir söz deyəcəm. Həmin vaxt bitdi, ananın qışqırıqları, fəryadı birinci mərtəbəyə çatırdı. Biz narahatlıq keçirirdik. Əslində ailədən bir nəfər xəstənin yanında olmalı idi. Amma bizi yaxına qoymadılar. Nəhayət, axşam saat 5-6 arası dedilər ki, uşaq doğuldu. Həkim çox gec gəlib otağına çıxdı. Biz maraqlandıq ki, həkimin əhvalı yaxşı deyil. Nə baş verdiyini soruşduq. Həkim etiraf etdi ki, doğuş pataloji hal alıb. Uşağın çəkisi çox olub. Guya UZİ həkimi aldadıb. Ana da, uşaq da yaxşı deyil. Mən dedim ki, burda baxa biləcəksinizmi, uşağı və ananı vəziyyətdən çıxara biləcəksinizmi? Dedi ki, burda hər şey edəcəklər. Uşaqda boğulma var, küvezə yerləşdirilib, vəziyyət nəzarətdədir. Beyin ödemi-oksigen çatışmazlığı var. Anaya da xeyli tikiş qoyulub. Vəziyyət gərgindi. Biz gecə tez-tez vəziyyətlə maraqlanırdıq. Düzü, ümidverici bir şey eşitmirdik. Uşağı görməklə bağlı cəhdlərimiz isə cavablandırılmırdı, ya olmaz, ya da uşağı görmək üçün 200 AZN ödəməlisiniz, deyirdilər. Nəhayət, uşağın atası hay-küy saldıqdan sonra baş direktora müraciət olundu və məni uşağın yanına apardılar. Gördüyüm mənzərə isə göz yaşlarıma səbəb oldu. Biz həmin anın şəkillərini telefonla çəkdik. Uşaq həkimi Nərmin xanım vəziyyətin kritik olduğunu, uşağı bu klinikada saxlamağın mümkün olmadığını bildirdi: ”Uşaq ağır keçən doğuş nəticəsində beyin travması aldığından ona aramsız oksigen təminatı lazımdır və bu klinikada isə şərait yoxdur. Ona görə də uşaq təcili olaraq K.Fərəcova adına Elmi-Tədqiqat Pediatriya İnstitutuna (“OMD” xəstəxanası) köçürülməlidir. Amma deyim ki, oksigensiz aparmaq olmaz, yolda vəziyyət daha da ağırlaşa bilər, «Mediklab»dan lobarotiraya çağırılmalı, amma pulunu siz ödəməlisiniz. 137-257 AZN. Vaxt yox idi, razılaşdıq. «Mediklab»a 257 AZN ödədik, uşaq”OMD”yə köçürüldü». Uşağın nənəsi Dilguşə Süleymanovanın sözlərinə görə, həkim-ginekoloq Lalə İmanova doğuş axşamından sonra görünməyib: «Biz onunla əlaqə yaratmağa çalışdıq, klinikada tapa bilmədik, zəngləriiz də cavabsız qaldı. Başımız uşağa qarışmışdı. Bir də gördük ki, ananın vəziyyəti pisləşir. Doğuşdan 1 həftə keçib. Həkim anaya 27 tikişlə necə rəftar etməyi öyrətməli imiş, əvəzinə qaçıb gizlənib. Ananın qarnında qoyduğu tampun da fəsad törədib və çürüməyə başlayıb. Aygünün Lalədən əvvəlki müalicə həkimi onun daxilində əməliyyat apardıqda dəhşətə gəldiyini gizlədə bilməyib: “Belə də vəhşilik olar?” deyə heyrətlənib. Bir müddət belə keçdi. Uşaqla yanaşı ananı da müalicə etdirdik. Ana və uşaq nisbi yaxşılaşma ilə evə buraxıldıqdan sonra ananın vəziyyəti pisləşdi və biz yenidən “Medilux”a müraciət etdik. Oradan həkim çağırıldı, günahları etiraf edildi, klinikanın direktoru Vaqif həkim vəziyyəti sabitləşdirməyə çalışdı. Klinikanın həkimi Surə xanım ananın daxili orqanlarını bir daha təmizlədi və müəyyən vaxtlarda gəlib yoxlama nəzarətindən keçməyi tapşırdı. Anaya vaxtaşırı nəzarət etmək Laləyə həvalə edildi. O isə nə vicdanının səsinə qulaq adı, nə də xəstə ananın əzablarına səs vermədi, nə də şikəst etdiyi körpənin taleyi onu maraqlandırdı… İndi ana da, uşaq da şikəstdir». Gördüyünüz kimi, bütün bunlar bir daha onu təsdiqləyir ki, hazırda reklam kampaniyası xüsusilə güclü təşkil olunmuş, Vahid Əmirovun direktoru olduğu «Medilux» Klinikasının fəaliyyətində ciddi nöqsanlar, hətta qanun pozuntuları belə, müşahidə olunmaqdadır. Məsələn, burada tibbi xidmətlərə görə müəyyən edilmiş qiymətlər, bir çox özəl klinikalarla müqayisədə olduqca yüksəkdir. Yaxın günlərdə bu və digər bir sıra məqamlarla bağlı əldə etdiyimiz bilgiləri diqqətinizə çatdıracağıq. Məsələ ilə əlaqədar qarşı tərəfin də mövqeyini işıqlandırmağa hazırıq.
