1100 Ermənistan vətəndaşı arasında keçirilən “Laçın yolunun bağlı olmasında günah kimdədir?” sorğusuna çoxluq “Günahkar Rusiya və Rus sülhməramlılarıdır” cavabını verib.
Tribunainfo.az yazır ki, bu barədə iqtisadçı Natiq Cəfərli məlumat paylaşıb. O bildirib ki, təkcə Azərbaycanda deyil, Ermənistanda da Rusiyaya qarşı ictimai rəy kəskinləşib:
“Tanınmış “GALLUP” şirkətinin Ermənistan təmsilçisi “Marketing Professional Group” 23-27 mart 2023-cü il tarixində 1100 Ermənistan vətəndaşı arasında sorğu keçirib. “Laçın yolunun bağlı olmasında günah kimdədir?” sualına, 36,3% “Azərbaycan günahkardır” cavabını verib, halbuki yanvar ayı sorğusunda 42,5% bu cavabı vermişdi. “Günahkar Rusiya və Rus sülhməramlılarıdır” cavabını verənlər 50,5% təşkil edib, öncəki sorğuda 42,2% belə cavab vermişdi. “Günahkar Türkiyədir” deyənlər 19,1% olub, “Günah Xənkəndidəki rejimdədir”, deyənlər 7,3% təşkil edib.
Görünən odur ki, Rusiyaya qarşı tək bizdə deyil, Ermənistanda da ictimai rəy kəskinləşir, bunu mütləq nəzərə almaq lazımdır, amma əsas məsələ odur ki, Xankəndidəki rejimi günahkar sayan 7,3% Ermənistan vətəndaşı var, onlar bəlkə də qonşu ölkənin xilası oldular, belə vətəndaşların sayları artsa, sülh də olacaq…”
