Respublika Gənclər Kitabxanasında Moskvada yaşayan soydaşımız, yazıçı-publisist Ulduz Qasımın son zamanlarda çapdan çıxmış üç kitabının - "Qarabağda qiyamət", "Ağ göyərçinlər" və "Qaçaq Aslan" əsərlərinin təqdimat mərasimi keçirildi.
Respublika Gənclər Kitabxanasının direktoru Aslan Cəfərov öz çıxışında qəlbi daim vətən sevgisi ilə döyünən, vətənpərvər xanım Ulduz Qasımın yaradıcılığında Qarabağ mövzusunun aparıcı xətt olduğunu, bu mövzuda qələmə aldığı əsərlərin gələcək nəsillər üçün müstəsna dəyərini, tarixi əhəmiyyətini qeyd etdi.
Tədbirdə "Xalq qəzeti"nin baş redaktorunun müavini, əməkdar jurnalist Tahir Aydınoğlu Ulduz xanımın qürbət eldə Vətən sevgisi ilə qələmə aldığı hər bir əsərinin Azərbaycanın, Qarabağ tarixinin, hadisələrinin təbliğatı yönümündə olan əhəmiyyətindən danışdı. Müəllifin Qarabağ mövzusunda yazdığı əsərlərin canlı şahidlərin xatirələri, Ulduz xanımın şəxsi tədqiqatları sayəsində yazıldığını söylədi. O bildirdi ki, Qarabağ uğrunda Vətən müharibəsindən bəhs edən ilk irihəcmli nəsr əsəri olan "Qarabağda qiyamət" romanında bu tarixi zəfərin geniş bədii-sənədli mənzərəsi əks olunub. Əsərdə Şuşa uğrunda misilsiz savaş daha geniş salnamələşib. Heydər Əliyev adına Ali Hərbi Məktəbin qardaş Türkiyədə 3 hərbi məktəb bitirmiş müəllimi şəhid Fərid Ələkbərovun əfsanəvi qəhrəmanlığı əhatəli təsvir olunub.
Tahir Aydınoğlu bildirdi ki, bu yaxınlarda Türkiyənin Azərbaycandakı hərbi attaşesi general-mayor Zəkəriyyə Yalçın Ulduz Qasımın "Qarabağda qiyamət" romanının baş qəhrəmanı şəhid mayor Fərid Ələkbərovun evində olub, ailəsini ziyarət edib və şəhidin anasıŞukufə xanımla səmimi söhbət edib. Zəkəriyyə Yalçın söhbət zamanı Fərid Ələkbərovun qəhrəmanlıqları barəsində Türkiyədə də çox məlumatlı olduğunu şəhid anasının nəzərinə çatdırıb və ona öz təşəkkürünü bildirib.
Jurnalist mərasim iştirakçılarına xatırlatdı ki, şəhid mayor Fərid Ələkbərov 1980-ci il iyulun 18-də Bakı şəhərində anadan olub. Orta məktəbi bitirdikdən sonra o, 1996-cı ildə Türkiyədə İstanbul Kuleli Hərbi Liseyinə daxil olub və 2000-ci ildə təhsilini bitirib. Həmin ildə Ankaradakı Quru Qoşunları Hərbi Məktəbinə daxil olan Fərid 2004-cü ildə həmin məktəbdə təhsilini başa vurub. Daha sonra isə Fərid Türkiyənin İsparta şəhərindəki Dağ Komando Məktəbinə daxil olaraq buranı da müvəffəqiyyətlə bitirib. Həmçinin 2005-ci ildə Polatlı Topçu Məktəbini də fərqlənmə diplomu ilə başa vurub.
2020-ci il sentyabrın 27-də Vətən müharibəsinin ilk günündən döyüşlərə qatılan mayor Fərid Ələkbərov Murov dağındakı yüksəkliklərin alınmasında iştirak edib, daha sonra isə Cəbrayıl, Füzuli, Şuşa istiqamətində gedən döyüşlərdə şücaət göstərib. O, noyabrın 8-də Xankəndi istiqamətindəki döyüşlərdə düşmənlə üz-üzə savaşaraq ayağından qəlpə yarası almasına baxmayaraq döyüşü davam etdirib. Döyüş zamanı Fərid Ələkbərov düşmənin xeyli sayda canlı qüvvəsini məhv edərək taborun mühasirədən çıxmasında böyük rol oynayıb. Təəssüf ki, bu, Fəridin sonuncu döyüşü olub. Fərid Ələkbərov 2020-ci il noyabrın 9-da Şuşa şəhəri yaxınlığında gedən döyüşlərdə qəhrəmancasına şəhid olaraq Bakıda İkinci Fəxri xiyabanda dəfn olunub.
Azərbaycan Respublikasının Prezidenti İlham Əliyevin 15 dekabr 2020-ci il tarixli Sərəncamı ilə Azərbaycanın ərazi bütövlüyünün təmin edilməsi uğrunda döyüş əməliyyatlarına qatıldığı və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə görə mayor Fərid Ələkbərov ölümündən sonra "Vətən uğrunda", "Şuşanın azad olunması", "İgidliyə görə" medalları ilə təltif edilib. Bütün bunlar barədə Ulduz Qasım romanda böyük sevgi və öyünclə söz açıb.
Tədbirdə iştirak edən qonaqlar - əməkdar jurnalistlər Zemfira Məhərrəmli və Antiqa Qonaq, "Şuşa" qəzetinin baş redaktoru, tədqiqatçı-jurnalist Vasif Quliyev Ulduz Qasımın yaradıcılığının müxtəlif çalarlarını, toxunduğu aktual və vacib mövzuları, məhsuldar, həm də olaylara fərqli baxış sərgiləyən bir yazar kimi geniş oxucu kütləsinə malik olduğunu qeyd etdilər.Müəllifin qələmə aldığı bütün əsərlərdə müşahidə edilən yazı üslubu, hadisələrin canlı təsviri, oxucuları riqqətə gətirən səhnələr haqqında danışdılar. Bu əsərlərin xarici dillərə tərcümə olunması və daha geniş oxucu auditoriyasında təbliğ olunması zəruriyyətini vurğuladılar.
Sonda müəllif Ulduz Qasım bu tədbirin məhz mədəniyyət ocağı olan gənclər kitabxanasında təşkil olunmasından böyük məmnunluq hissi duyduğunu qeyd etdi, tədbirin təşkilinə görə kitabxanaya öz dərin minnətdarlığını bildirdi. Təqdimatı keçirilən kitabların vətənpərvərlik ruhunda yazılan, baş vermiş tarixi gerçəkliklərə əsaslanan əsərlər olduğunu söyləyərək, bundan sonra da bütün yaradıcılığını bu mövzuya həsr edəcəyini bildirdi.
Ulduz Qasım Bakıda olduğu günlərdə Şuşa fatehi Fərid Ələkbərovun ailəsi ilə görüşüb geniş material toplayacağını və şəhid qəhrəman barədə ayrıca kitab yazacağını da söylədi.
Tədbirin sonunda müəllif kitablarını imzalayaraq, ilk nüsxələrini şəhid Fərid Ələkbərovun anası Şukufə Hüseynovaya və digər qonaqlara təqdim etdi.
