![“City Hospital” xəstəni bəlaya salıb, yaxasını kənara çəkir - ŞİKAYƏT VAR “City Hospital” xəstəni bəlaya salıb, yaxasını kənara çəkir - ŞİKAYƏT VAR](http://xezer.info/uploads/posts/2016-06/thumbs/1466618279_1466610409_1.jpg)
Özəl tibb klinikaları xarici ölkələrdən həkim dəvət edirlər. Lakin əcnəbi həkimin yanlış müalicə və əməliyyatına görə klinikalar məsuliyyəti üzərinə götürmürlər.
Bunu virtualaz.org saytına Azad İstehlakçılar Birliyinin sədri Eyyub Hüseynov deyib.
Hüquq müdafiəçisinin sözlərinə görə, əcnəbi həkimlərin yanlış müalicəsindən narazılıq edənlər var. “Təşkilatımıza Göyçay rayon sakini Əntiqə Mövsüm qızı Süleymanova tərəfindən şikayət daxil olub. Şikayətçi bildirir ki, “City Hospital” tərəfindən dəvət edilən türk həkimi İlkan Dündarın qəbulunda olub. Həkim ona onkoloji xəstə olduğunu deyib və Türkiyədə müalicə olunacağına inandırıb”,-deyə E.Hüseynov əlavə edib.
Türkiyədə əməliyyat Əntiqə Süleymanovaya 23 min dollara başa gəlib. Lakin xəstənin səhhəti yaxşılaşmaq əvəzinə günü-gündən pisləşib: “Vəziyyəti pisləşən şikayətçi sonradan türk həkimlə əlaqə yarada bilməyib. Klinika isə bu işdə məsuliyyət daşımadığını deyir. Təşkilatımız da klinikaya müraciət edib, lakin müsbət cavab almayıb”.
Şikayətçi 23 min dolların geri qaytarılmasını, ona dəymiş maddi və mənəvi ziyanın klinika tərəfindən ödənilməsini tələb edir.
“Baku City Hospital“dan isə virtualaz.org saytına bildiriblər ki, rəhbərliyin icazəsi olmadan sualları cavablandıra bilməzlər.