MHP Qurultayı bir tezisimizi haqlı çıxardı. MHP ilk dəfə bu qədər çox namizədlə 10 iyul seçkisinə getsə də, yenə favorit namizəd Dövlət Baxçalıdır. Müxaliflər birləşməyəcəyi təqdirdə, yeni başqan olmayacaq. Gördüyüm qədəri ilə başqanlığa ən iddialı və real alternativ Meral Akşener olsa da, digər dörd namizəd öz daxillərindən namizəd çıxararaq, müxalif səsi parçaladığı təqdirdə, yenə Dövlət yerində qalacaq. Meral Akşenerin partiya nizamnaməsi ilə bağlı digər namizədlərdən xəbərsiz dəyişiklik etməsi və onlarla birlikdə iftar süfrəsinə qatılmaması da göstərir ki, müxaliflərin onun ətrafında birləşməsi ehtimalı azdır və Meral xanım da buna o qədər həvəs göstətmir.
Ancaq MHP daxilində ciddi təşkilatlanmaq istəyi, digər alternativ namizədlərlə uzlaşmaqdan daha çox küskün ülkücüləri ətrafına yığması Akşenerin yeni hərəkat istəyi kimi dəyərləndirilə bilər.
Göründüyü qədər, Meral Akşenerdən sonra qurultay nümayəndələri ilə işləyən Sinan Oğandır. MHP qurultayında həlledici nəticəni ona veriləcək səslər müəyyənləşdirəcək. Alparslan Türkeşin qızı Çağrının Oğanı dəstəkləməsi onun əlini gücləndirir. Ümit Özdağ, Koray Aydın və şəhid Gün Sazakın oğlu Süleyman Sazak MHP cameəsi içərisində ciddi isimlərdir. Ancaq göründüyü qədər Meral Akşener qədər təbliğatla məşğul olmayıblar. Qurultayda Meral Akşener faktorunun ağırlığı bunu deməyə əsas verir. Lakin başqanın seçiləcəyi 10 iyul qurultayında hər bir müxalif namizəd ciddi səs götürə biləcək. Ülkücülükdən gəlmə namizədlər (Ümit Özdağ, Koray Aydın, Süleyman Sazak və Sinan Oğan) birləşəcəkləri təqdirdə, Baxçalı seçilsə də, partiyaiçi güclü müxalifət olaraq qalacaqlar. Baxçalı namizəd olmayacağı təqdirdə (ki, bu zəif ehtimaldır) hazırki sədri dəstəkləyən qurultay nümayəndələri işarə edilən namizədə dəstək verərək, seçki sonuclarını müəyyənləşdirəcəklər. Baxçalının rəqibləri arasında tək ülkücünün Koray Aydın olduğunu deməsi və bu namizədin hazırda Meral Akşenerlə daha açıq mübarizə aparması ağıllara vəliəhdin K.Aydın olmasını gətirir. Baxçalının ən qədim dostuna postunu verməsi gözlənilən ehtimallar arasındadır. Ancaq hazırkı məqamda bu çox xəif ehtımaldır.
Ülkücü namizədlər Doğru Yoldan gələn Meral Akşenerin ətrafında birləşə bilərmi? Akşener çox ciddi işləyir, fəqət ülkücü cameə bir xanımın “rəis”liyini asanlıqla həzm etməz. Onun üçün qurultayı keçirdiyinə görə, zəfər nidaları atsa da, başqanlıq yolu o qədər asan deyil.
Yenidən Baxçalı seçilsə nə baş verəcək? Koray Aydın, Süleyman Sazak və Ümit Özdağ MHP-də yollarına davam edəcəklər. Sinan Oğanın isə partiyada qalma ehtimalı yüksək olsa da, yeni bir partiya-güc mərkəzi yaranarsa, onun MHP-dən ayrılması və orada daha güclü mövqeyə gəlməsi mümkündür. Meral Akşenerin isə başından bəri MHP başqanlığından daha çox AKP-yə qarşı qurulması gözlənilən yeni güc mərkəzinin kilid isimlərindən biri olmağa çalışdığını iddia etmişik və o iddiamızda da qalırıq. Türkiyədə öz postunu buraxmaq istəməyən heç bir başqan (xüsusilə, sağ və mərkəzçi) partiya sədrliyindən uzaqlaşdırıla bilməyib. Bu səbəbdən də, Meral xanımın daha çox MHP-də özünə ciddi kadr yığdığı və gələcək partiyanın təməllərini atdığı versiyası üzərində dayanırıq.
Yeni partiya yarana bilərmi və kimlərdən ibarət ola bilər? Nəzərə alsaq ki, İngiltərənin baş naziri Braun son dönəmdə həddindən artıq Türkiyə əleyhinə danışır, bu sadəcə öz əhalisini Türkiyənin Avropa Birliyinə üzv olmağa əngəl olacaqlarına inandırmağa çalışmaq deyil. İngiltərə Türkiyədə ciddi maraqları olan və bu maraqlarını qoruyan güclü yerli dəstəyə malik ölkədir. Bu dəstəyi verəcək gücün hazırda ən favorit ismi isə sabiq prezident Abdullah Güldür. Məhz Abdullah Gül, Әli Babacan, Kamal Dərviş, Abdullatif Şener, Turhan Çömez kimi cəmiyyətdə hələ də tükənməmiş və Әrdoğan iqtidarı zəifləyəcəyi təqdirdə, yeni alternativ güc mərkəzi ola biləcək şəxslərdən. Meral Akşenerin isə bu yeni ittifaqın əsas üç simasından biri olma ehtimalı onun başqan olmasından daha yüksəkdir. Ayrı partiya quracağı təqdirdə, isə sonu keçmiş partiyadaşı Mehmet Ağardan fərqli olmayacaq.
Qısacası, bu yay gözlənildiyindən daha isti keçəcək…
Aqil Әləsgər, Yenicag.az Analitik İnternet Qəzetinin baş redaktoru
Teref.info olaraq yazıda keçən bir çox fikirlərlə razı olsaqda, yazıda əslində ana xətt kimi beyinlərə yeridilən AKP ağırlığı daşıyan fikirlə qəti razı deyilik!!
