Erməni silahlı bölmələri cəbhə bölgəsində yaşayan mülki sakinləri yenidən atəşə tutub.
Bu barədə azvision.az-a Tərtərin Qarağacı kəndinin bələdiyyə sədri Rizvan Əzizov məlumat verib.
Bələdiyyə sədrinin sözlərinə görə, Qapanlı kəndində kombaynla ot biçən sakinlər atəşə məruz qalıblar: “Erməni silahlı birləşmələri yenidən mülki sakinlərə atəş açmağa başlayıb. Ötən gün Qapanlıda əkin sahəsində işləyən kənd sakinləri atəşə məruz qalıb. Xoşbəxtlikdən xəsarət alan olmayıb. Əkin sahələrinə və texnikaya ziyan dəyib”.
Qeyd edək ki, Azərbaycan Müdafiə Nazirliyinin yaydığı rəsmi məlumata görə, erməni silahlı bölmələri cəbhənin müxtəlif istiqamətlərində sutka ərzində atəşkəs rejimini ümumilikdə 8 dəfə pozub.
Ermənistanın Berd rayonunun Çinari kəndində yerləşən mövqelərdən Tovuz rayonunun Ağbulaq kəndində yerləşən mövqelərimiz atəşə tutulub.
Tərtər rayonunun Çiləbürt, Ağdam rayonunun Yusifcanlı, Füzuli rayonunun Horadiz, Aşağı Seyidəhmədli kəndləri yaxınlığında, həmçinin Goranboy, Xocavənd və Füzuli rayonları ərazisindəki adsız yüksəkliklərdə yerləşən mövqelərdən də Silahlı Qüvvələrimizin mövqeləri atəşə tutulub.
