Prezidenti İlham Əliyevin Nəqliyyat, Rabitə və Yüksək Texnologiyalar Nazirliyinin yaradılması haqqında imzaladığı sərəncamla Azərbaycanda 2 nazirlik birləşdirildi
Sərəncama uyğun olaraq Ramin Namiq oğlu Quluzadə Azərbaycan Respublikasının nəqliyyat, rabitə və yüksək texnologiyalar naziri təyin edilib. Bu halda Ziya Məmmədov faktiki olaraq nazir postundan uzaqlaşdırılmış oldu.
Dəyişikliyi şərh edən Milli Məclisin İqtisadi siyasət, sənaye və sahibkarlıq komitəsinin üzvü Vahid Əhmədov Modern.az-a açıqlamasında bunu ölkədə başlanan struktur islahatlarının növbəti dalğası kimi dəyərləndirib:
"Cənab Prezidentin sərəncam və göstərişlərinə əsasən, struktur islahatları davam etdirilir. Faktiki olaraq son vaxtlar Nəqliyyat Nazirliyinin tabeliyində olan bütün idarə və təşkilatlar ya sərbəst işləyirdilər, ya da məhdud məsuliyyətli cəmiyyətə çevrilmişdilər. Buna misal olaraq da "Azərbaycan Dəmir Yolları” Qapalı Səhmdar Cəmiyyətini göstəmək olar. Bu qurum nazirlikdən ayrıldıqdan sonra Cavid Qurbanovun sədrliyilə çox böyük inkişaf yoluna qədəm qoydu. Eləcə də "Azəravtoyol” ASC”.
Parlament üzvü islahatların davamlı olacağını bildirib: "Bu, hazırki şəraitdə həm ölkənin inkişafı, həm də büdcəyə qənaət edilməsi baxımından çox lazımlı məsələdir. Azərbaycanda nazirliklərin, komitələrin sayı həddindən çoxdur. Bu strukturların sadələşdirilməsinə çox böyük ehtiyac var. Cənab Prezidentin atdığı bu addımları yalnız alqışlamaq olar”.
