İqtisadçı ekspert Samir Əliyev "qara bazar” da dolların ucuzlaşması və manatın bahalaşacağı barədə yayılan xəbərlərə münasibət bildirib
S.Əliyev açıqlamasında qeyd edib ki, bu gün valyuta bazarında baş verən prosesi heç də normal hal qəbul etmir: "Çünki manatın bahalaşması üçün heç bir iqtisadi əsas yoxdur. İxrac artmayıb, Neft Fondu valyuta hərracında dollar təklifini artırmayıb. Əksinə, dollar təklifi 35 milyona düşüb. İdxal prosesi kəskin azalmayıb. Dünya bazarında dollar kəskin ucuzlaşmayıb. Tədiyyə balansında müsbət saldo yaranmayıb. Bütün bunlar onu göstərir ki, baş verənlər spekulyasiyadır.
Manat kütləsi yanvarda təxminən 6 faiz azalıb. Təxminən bu da 600 milyon manat deməkdir. Bu gün faktiki olaraq manat satılmır ki, banklar gedib dollar alsınlar. Büdcədə sosial xərclər itsisna olmaqla digər sahələrə yanvar-fevral aylarında vəsait ayrılmır. Ona görə də bu gün dollara təlabat yoxdur.
Ölkədə hazırda manat qıtlığı var. Manat daha çox şirkətlərin hesabına yönəldilir. Çünki bankın müştərisi qarşısında öhdəliyi var. Manat qıt olduğuna görə də banklar alış kursunu çox faizlə aşağı salıblar. Mərkəzi Bankın müəyyən etdiyi məzənnədən 10 faizlik fərq yaranıb. Hazırda banklar kredit verib pul qazana bilmədiklərinə görə dolların alışından pul qazanırlar”.
İqtisadçı hesab edir ki, bu spekulyasiyanın qarşısı Mərkəzi Bank və Maliyyə Bazarlarına Nəzarət Palatası tərəfindən alınmalıdır: "4 faizlik marjanın ləğvindən sonra bu məsələlər yarandı. Elə bank var ki, bundan 15 faiz gəlir əldə edir. Bu çox təhlükəli rəqəmdir. Gözləntim odur ki, bu həftədən başlayaraq müəyyən qədər proseslər doların xeyrinə dəyişməyə gedəcək. Manatın kəskin bahalaşması prosesi olmayacaq və mən 1.30 həddini real saymıram”. (Qafqazinfo)
