Bakı Dövlət Universitetinin Beynəlxalq proqramlar və qrantlar şöbəsinin əməkdaşı Mehdi Gülməmmədli Azərbaycan Respublikasının Təhsil Nazirliyinin xətti, Çin Xalq Respublikasının Ticarət Nazirliyinin dəstəyi, Ningbo Politexnik Universitetinin təşkilatçılığı ilə Çində baş tutan beynəlxalq seminarda iştirak edib.
“Xezer.info” xəbər verir ki, "Seminar for Teachers from developing Countries along the One Belt One road” adlı beynəlxalq seminarda Azərbaycan, Özbəkistan, Gürcüstan, Nigeriya, Panama, Misir və Vanuatudan olan nümayəndələr müxtəlif mövzularla bağlı mühazirələrdə çıxış ediblər. Onlar, həmçinin seminar çərçivəsində ÇXR-in Siamen, Şanxay şəhərlərinə səyahət edərək orta ümumtəhsil məktəblərində olub, ali məktəblərdə dərsləri müşahidə ediblər.
Həftənin beş günü baş tutan mühazirələr ərzində ÇXR-in mədəniyyəti, elmi tədqiqatın əsasları, çin elementləri, çin kallioqrafiyası, müasir təlimin əsası: İnnovasiya və müasirlik, beynəlxalq təhsil, dərsin təşkilində ən çox istifadə olunan müasir təlim metodları və onlardan istifadə, uğurlu dərsin təşkili və qiymətləndirilməsi, milli mədəniyyət və xalqlararası ünsiyyət kimi mövzular ətrafında maraqlı və interaktiv diskussiyalar təşkil olunub.
